ភ្នំពេញ៖ នាយករដ្ឋមន្ត្រីស្ដីទី នេត សាវឿន បានលើកឡើងថាជម្លោះក្នុងតំបន់ និងផ្ទៃក្នុងរយៈពេលជាង ៣០ឆ្នាំបានបន្សល់ទុកនូវបញ្ជាជាច្រើនដល់កម្ពុជាក្នុងការដោះស្រាយ ហើយបញ្ហាមីនក៏ជាបញ្ហាដែលស្មុគស្មាញយ៉ាងធ្ងន់ធ្ងរមួយផងដែរដល់កម្ពុជា ទោះជាយ៉ាងណាកម្ពុជាបានបង្ហាញនូវភាពរឹងមាំ និងអំណាចនៃការរួបរួមគ្នារបស់កម្ពុជាដែលអាចស្ដែងចេញតាមការអភវិឌ្ឍដែលបានឃើញក្នុងពេលបច្ចុប្បន្ន។

ថ្លែងក្នុងសន្និសីទសកលលោកលើកទី៣ ស្ដីពីកិច្ចសង្គ្រោះជនរងគ្រោះថ្នាក់ដោយសារមីន និងសំណល់ជាតិផ្ទុះពីសង្គ្រាម និងបរិបទនៃសិទ្ធិជនមានពិការភាព កាលពីថ្ងៃទី១៩ ខែតុលា ឆ្នាំ២០២៣ លោក នេត សាវឿន បានថ្លែងថា រយៈពេលជាង ៣០ឆ្នាំមកនេះកម្ពុជាបានបង្ហាញប្រាប់ពិភពលោក ទោះបីកម្ពុជាជួបទុក្ខលំបាកខ្លាំងប៉ុណ្ណា ក៏កម្ពុជានៅតែអាចស្ដារនិងអភិវឌ្ឍប្រទេសឡើងវិញបានផងដែរ។

លោកថា៖ «កម្ពុជាពុំត្រឹមតែអាចកសាងនិងអភិវឌ្ឍន៍ខ្លួនប៉ុណ្ណោះទេ ប៉ុន្ដែកម្ពុជាក៏មានលទ្ធភាពផ្ដល់នូវក្ដីសង្ឃឹមដល់ជាតិសាសន៍ដទៃទៀត ដែលកំពុងរងគ្រោះដោយសារសង្គ្រាមតាមរយៈការបញ្ជូនកងរក្សាសន្ដិភាពប្រមាណ ៩ ០០០នាក់ ក្រោមក្របខ័ណ្ឌបេសកម្មរក្សាសន្ដិភាពអង្គការសហប្រជាជាតិគិតពីឆ្នាំ២០០៦មក»។

នាយករដ្ឋមន្ត្រីស្ដីទី នេត សាវឿន បានលើកឡើងផងដែរថាជាមួយនឹងការរីកចម្រើននេះកម្ពុជាក៏នៅតែប្រឈមនឹងកាកសំណល់ជាតិផ្ទុះពីសង្គ្រាម និងគ្រាប់មីនផងដែរ ដែលរហួតមកដល់ពេលនេះបានរំដោះផ្ទៃដីបានប្រមាណ ២ ៧៩៥គីឡូម៉ែត្រការ៉េ ខណៈមានជនរងគ្រោះដោយគ្រាប់មិនទាន់ផ្ទុះទាំងនេះមាន ៦៥ ០៣១នាក់ ស្លាប់ ១៩ ៨២២នាក់ របួស ៣៦ ១២៣នាក់ និងពិការ ៩ ០៨៦នាក់។

ជាមួយនឹងកិច្ចខិតខំទាំងអស់នេះ នាយករដ្ឋមន្ត្រីស្ដីទី នេត សាវឿន បានដាក់គោលដៅថាប្រទេសកម្ពុជាត្រូវបន្តប្ដេជ្ញាចិត្ត និងបន្តដំណើរវែងឆ្ងាយទៅមុខទៀតដើម្បីឱ្យសម្រេចបាននូវចក្ខុវិស័យមួយដែលបានកំណត់ក្នុងផែនការគឺ «កម្ពុជាជាប្រទេសដែលគ្មានមីន ហើយការគំរាមកំហែងដោយសារសំណល់ជាតិផ្ទុះពីសង្គ្រាម ត្រូវបានកាត់បន្ថយឱ្យនៅកម្រិតអប្បបរមា និងមានការអភិវឌ្ឍសេដ្ឋកិច្ចសង្គម និងធនធានមនុស្សប្រព្រឹត្តទៅដោយសុវត្ថិភាព»។

គួរឱ្យដឹងផងដែរថាកម្ពុជាមានគោលដៅក្នុងការបោសសម្អាតគ្រាប់មីនឱ្យអស់នៅត្រឹមឆ្នាំ២០២៥ ខាងមុខ៕